【育儿心得】幼儿必经之路：戒片阶段，戒片KO！

【文章原刊于01撑场，欢迎下载香港01 app，与星级作者一同讨论喜爱话题。】

撰文：wagyubmami 和牛妈妈

幼儿到达两岁嘅时候，父母就会好心急想快啲帮BB戒甩尿片。
其实戒片，都系帮BB脱离幼儿时期最重要嘅一环。

坊间有唔少戒片方法，但对于我嚟讲其实没有特定嘅最佳方法，因为每个小朋友发展、性格都唔同，无一种特定方法可以对应到所有小朋友嘅。

无得急，无得迫，唔好令佢对于戒片系一件反感嘅事，我哋只有配合佢哋成长而做好准备。

我哋喺和牛B大概两岁4个月嘅时候，开始进行在家唔着尿片嘅训练。日间喺屋企戒片，我谂我哋大概开始咗两至三日，佢就学识咗。
喺戒片初期，喺屋企日常活动，我哋唔着片，大概每30分钟问佢或提佢去厕所。
如果唔问／唔提佢哋就会好可能，因为挂住玩而唔记得咗去厕所。
就算而家，我哋都会间唔中提下佢。不过，佢基本上已经懂得自己知道急就会去厕所，除非挂住玩唔记得咗。

而戒片我认为最重要就系提示佢哋去厕所，习惯呢一个模式。
习惯咗之后，佢哋仲会自己拎定纸巾，帮自己清洁。

和牛B而家2岁11个月，俾佢适应咗一段时间唔著片，我哋外出已经可以唔著片，唯独是午睡及夜晚瞓觉都会着尿片嘅。

其实最初期，佢哋仲未识得分咩系急，通常都会尿湿裤子又或者一地都系尿，都系好正常。家长唯有辛苦少少，洗多几条裤、拖多几次地。但对于每个小朋友，尿湿裤子嘅反应都好唔同，有啲小朋友一啲反应都无，有啲会觉得好惊，有啲就会觉得好污糟好怕。至于戒片最好系咩时候呢？我觉得系夏天最好嘅时候，因为冬天着嘅衫裤或会比较多，若然尿湿裤仔，要换裤／洗Pat Pat都会怕小朋友冻亲以及比较烦嘅。
 

戒片必备：小童便厕
幼儿初期学习戒片，呢款便厕较为方便幼儿自行去厕所，亦方便清洁。
 

【总结】
而家去到最后一步，外出戒片阶段，我最伤脑筋嘅就系商场未必有儿童厕又或者超长嘅排队人龙。所以初期戒片，我都会袋一两块尿片喺身，当然唔少得多一套衣物啦。

如果成功出街都戒埋片，亦即系话，妈咪终于可以摆脱大大个走佬背囊了。

【编按：文章题目为编辑所拟，原题为“【育儿心得】幼儿必经之路。戒片阶段。戒片KO!”】

（文章纯属作者意见，不代表香港01立场。）