唐英年诉说与Burgundy的情缘　教你一招拣啱饮的红酒｜珍姬蜜

回归25周年，各大传媒皆忙于找各界名人代表做访问，政经界亮相较多的，自然少不了唐英年。原因无他，商界出身的唐英年﹙“唐唐”﹚曾担任政务司司长、财政司司长，现时担任全国政协常委，份量十足。再加上香港故宫文化博物馆即将开幕，唐唐作为西九文化区管理局董事局主席自然力撑，早前也出席馆内演讲厅命名仪式，贯彻其一向幽默嘅风格，祝愿博物馆开幕后“客似云来”！

小珍早前亦有访问唐唐，问佢点睇香港回归25周年的发展，期间讲到政府政策对产业的推动很重要，好似唐唐在任时废除红酒税，令香港一跃成为最大红酒拍卖中心。小珍十分同意，也借机请教下佢“红酒经”。

众所皆知，唐唐喜欢法国葡萄酒产区Burgundy﹙布根地﹚嘅红酒，更难得是“识于微时”。这几年，Burgundy红酒有价有市，佳士得近日拍卖一组12瓶1999年DRC Romanée-Conti，就以300万元成交，平均每瓶约25万元，教小珍身边不少迟开始饮Burgundy红酒嘅朋友“叫苦连天”！

不过，对于拥有大量珍藏嘅唐唐应该好开心，因为唔使同人争贵货，佢笑笑口话，“好欢迎愈来愈多人喜欢Burgundy，因为我喜欢咗Burgundy几十年，有几款好出名嘅酒，我请咗人饮几年，价钱不断倍升！我都‘闹’ producer，同佢讲‘喂大佬，我好早开始买，唔好愈Cut愈多（啲货）先得’！”

钟情布根地红酒够“优雅”

唐唐同小珍讲，年轻时负芨美国时先学饮红酒，最初都系喺超市买啲经济实惠嘅红酒慢慢试，直至后来试咗Burgundy嘅红酒，一试爱上。“因为我几钟意呢种味，我钟意佢嘅花香、优雅、balance嘅口感，而且佢好适合一班朋友倾下偈、食花生、薯片，食中餐又得、西餐又得，唔系好‘漏’，唔系一定要食牛扒去配合佢，而系任何时间都饮得！”

作为Burgundy专家，唐唐自言，唔会吝啬同朋友分享靓酒。“大家都饮几个好出名嘅酒庄，𠮶啲我已经饮咗几十年，而家可以好开心揾啲旧年份，但又贮存得好，同啲少饮Burgundy朋友饮，佢话枝酒原来咁嘅味。原来Burgundy好‘脆弱’，trade得多（易手）会冇咁好饮。”

2013年拍卖红酒 因伙记一句话

唐唐收藏Burgundy红酒多年，曾经摆到酒库都爆满，2013年拎出部份靓酒出嚟拍卖，原来唔系因为睇到Burgundy嘅“商机”，只系由于酒窖伙记嘅一句话──“唐生你太多酒喇，用咁啲啦！”

唐唐解释道，早年在政府工作“实在搞唔掂”，讲紧嘅唔系公事，而系红酒！“以前我未入政府好多social drinking，用酒用得多，个酒庄我成日买，一路饮一路买，酒庄就愈俾愈多货。但后来入了政府好忙，少了social drinking，愈来愈少时间饮酒，变咗倾公事都拎出嚟饮，咩场合都系我提供酒。最后我要周围派畀人，例如司机、发型师！”

直至2013年离开政府，唐唐才有时间整理库存，于是与佳士得合作，举行“寻味之旅：唐英年窖藏珍酿”拍卖 。当年809件酒品一共卖出4,805万元，较估值高出1,835万港元。问及现在会否趁价高再出货，唐唐摇头笑言“而家多咗人可以送，个圈子比以前大好多！”

教你一招“拣”红酒

虽说对Burgundy嘅红酒情有独钟，但唔代表唐唐唔饮其它红酒，实情佢仲会揾新嘢尝试！“最近试咗几枝Slovenia啲红酒，有一枝都几好饮。”即便是“索尼军”内地红酒，唐唐也欢迎，“佢哋仲探索紧，造酒唔只系讲技术，同时系一门艺术，中国嘅技术掌握得好好，完全冇问题，系艺术仲需要摸索一下”。

对于小珍呢啲新手想学饮红酒，希望唐唐推介几款心水，岂知唐唐却十分贴地咁话，“试酒唔好听我讲，大家口味都系独一无二，我觉得好饮同好正嘅酒，唔代表人地同意！”不过，佢都有个小贴士俾小珍，“假如你预算消费三千蚊，唔好买一枝酒，会好失望。你去酒铺同店员讲买6枝、8枝，甚至10枝，要不同品种、葡萄、国家嘅酒。新西兰、美国、Bugundy，咩都试吓！”

直至试到知道自己钟意边只酒，然后再锁定该地区嘅红酒。“例如你钟意Pinot noir，好多地方都有Pinot noir，再试原来钟意Burgundy。咁Burgundy都有好多区、好多village，Côte de Nuits、Côte de Beaune。记住唔好买Grand Cru，买啲村酒先，一个好的酿酒师，佢啲Grand Cru好出名，其实村酒一样好好饮，但村酒系十分一价钱！”