昔日股王思捷爆升　股坛猛人庄友坚教路　买股前先买衫 ｜珍姬蜜

港股呢排浮浮沉沉，尤其喺加息阴霾下，大型科网股及其他高估值股份“难逃一跌”，想喺金鱼缸揾食已愈嚟愈难！大股冇运行，反而二、三线股却相对活跃，近日缸边友金睛火眼留意住嘅其中一只股票，非思捷（0330）莫属。

呢只昔日股王思捷升至“红底”后爆煲，本来要已摆落“柜桶底”，但近日却异常生猛，恒指年初至今跌约15%，思捷股价反而逆市由7毫子大升1.2倍至约莫1.6元，突破三年高位。

丑股翻生，总有原因。中南证券揸弗人庄友坚妻子、维他奶（0345）后人罗琪茵近年大手入股思捷，持股比重已升至近28%，成为最大单一股东。罗琪茵入股思捷，庄友坚“角色”相信也不少，思捷的国际总部便位于他北角华汇中心的“大本营”。

讲起庄友坚，稍有股龄的朋友，都知道他纵横股海逾30年，活跃细价股，而罗琪茵也有唔少资本操作，两人出手，点石成金无咩出奇，但“空降”昔日明星服装股，唔少缸边友都有个“黑人问号”——搞边科？同一条问题，小珍去年便问过庄友坚，他当时笑笑口话“每个人都著衫，需求很大！”答案似“阿妈系女人”，但思捷易主后，新主积极“换血”，重新打造品牌，又不似讲笑。

亲自操刀度桥救业绩

眼见思捷近日热炒，小珍就梗系要问吓熟悉思捷嘅朋友，听讲庄友坚对思捷每条账目都了如指掌，甚至连欧洲边度税务重都知，亲自度桥睇吓点样可以悭钱。“老细（庄友坚）不嬲都好美国佬style，钟意自己睇、自己做，而且觉得啱就去做，就算打官司都要做。早年告美林就系咁，告完冇嘢㗎，之后美林咪继续同老细做生意。”

讲紧嘅系2013年庄友坚相关之公司入禀高院，向美林索偿逾4.2亿元。原诉指2008年受美林一方误导，借出约7,050万元予德发集团（0928，现名莲和医疗），结果公司清盘，原诉无法收回大部分还款，欠债连同利息现超过4.2亿元，要求美林赔偿。

小珍近排去北角做GYM，见到有啲蓝眼碧发嘅欧洲人出入华汇中心，忍唔住再向老友八卦，原来系思捷嘅高层。“老细好有心想做返好盘生意，欧洲收入贡献大，特登请啲外国人返嚟落手落脚做，亲自同佢哋开会同倾策略。”

股坛猛人教拣股 十分“Peter Lynch”

此话不虚，思捷近年改革“大破大立”，先系将唔赚钱嘅亚洲业务结束，主力谷起欧洲嘅零售及批发生意，同埋发展网上店舖业务，就连总部也由九龙湾高银金融国际中心搬到北角老板商厦， 月悭近20万租。

小珍睇翻思捷最新2021年度成绩表，收入83.16亿元，虽然较2020年全年收入92亿元少，但经过一轮操作，已由一年蚀近40亿元，改为赚3亿元，扭转过往5年亏损情况。

基本面有向好迹象，加上庄友坚“溢价”，股价有哂上升的理由。近日不少缸边友均有斩获，小珍之前难得到北角同庄生食饭，已把握机会问呢位股坛猛人，几时先可以入手思捷，佢当时笑住讲，“有一日你觉得ESPRIT啲衫靓，睇个网站想买佢啲衫𠮶阵就系时候喇！”答案有啲玄，但好似Peter Lynch（彼得林治）选股法，著重喺日常生活中寻找潜力股。睇黎小珍买股之前，要做嘅系买多几件衫先！