罕拍卖私人珍藏　大刘原来情倾珠宝　铭记一个爱的故事｜珍姬蜜

疫情下，小珍冇得去旅行shopping，多咗留意拍卖行啲靓袋同珠宝。旧年全球三大拍卖行嘅总拍卖成交额达到150亿美元，破哂纪录！嚟紧4月尾又有苏富比（Sotheby’s）香港春季拍卖，原本小珍都系想睇吓有咩靓袋，点知见到有个专拍叫“皇苑蕴珍 — 刘銮雄藏御瓷萃珍”，大刘将会拎啲珍藏嘅中国珍瓷出嚟拍卖！

众所周知，大刘爱收藏艺术品，无论系古董瓷器、古董家私、唔同艺术流派嘅中西名画、雕塑、珠宝及名酒都有收藏。苏富比形容大刘30岁开始投资艺术品，但大刘身边人同小珍讲，大刘其实早喺27岁时，已通过公开拍卖或者“私人洽购”搜集艺术珍品，今次只系拎咗其中一小部分中国珍瓷出嚟拍卖！

话就话“一小部份”，但都不能睇小！今次大刘拣咗8件中国珍瓷，单系估值已经1.5亿元！其中，永乐朝嘅青花𧃍龙纹罐，见到二兽相互逐追，笔触灵动，钴蓝浓艳，当属明初臻绝之作，估值6,500万元。而清代瓷器中，则有雍正粉彩福寿双全图大盘，桃花盛绽，果实累累，枝叶茂密，过墙而生，估值2,500万元。这个大盘曾先后为岩崎男爵，及名媛芭芭拉．赫顿嘅典藏，不但收藏品本身，就连收藏者都赫赫有名！

至于大刘咁多收藏之中，大刘身边人就话佢最钟情嘅原来系名贵珠宝，背后蕴藏住一个“侍母至孝”嘅感人故事。原来大刘妈妈叶淑婉生前十分喜爱名贵珠宝，但当年每当佢同子女前往珠宝店都只系“斋睇唔买”，情愿悭埋啲钱，供子女读书之用。所以日后当大刘有能力𠮶阵，就不计代价买入世间罕见嘅名贵珠宝畀妈妈，为嘅系博妈妈一笑，弥补妈妈嘅付出！

事实上，大刘孝顺亦系人所共知嘅事，以前刘妈妈在生时，小珍亦不时见到大刘同刘妈妈一齐到福临门饮茶，身体力行表达孝意。

【财经专栏】《中环Gossip Girl》｜珍姫蜜

作者介绍：珍姫蜜﹙小珍﹚游走股海赌台名利场，见尽金钱筹码博弈，冷眼人性贪婪，旁观金融八卦。