【每逢大事讲故事】欧洲右翼联盟开Party 三剑客会变五星战队？
自从美国选出咗特朗普之后，世界左右翼平衡就唔再一样啦，法国就有视特朗普胜出为“希望嘅标志”嘅马林勒庞；荷兰出咗个叫摩洛哥人做人渣嘅怀尔德斯，而即使系大家以为大爱无限嘅德国都有位佩特里叫警察射杀难民。
冇错，欧洲首个右翼大联盟上线啦！
右翼三剑客其实真系friend底，唔系飞云屈佢哋㗎，就喺特朗普就任典礼后一日，应德国另类选择党（AfD）邀约，三剑客喺德国科布伦茨（Koblenz）上演咗一场《右翼星光熠熠耀欧洲》啦。
“昨日有新美国，今日有新欧洲！”来自另择党嘅36岁党员Marco Kopping咁讲，相信道出咗好多欧洲右翼嘅愿景。爆出著名“ 下体论”嘅特朗普都跑出到，就印证咗政治正确真系唔值钱。
其实早于特朗普上位前，欧洲嘅右翼政党已经慢慢想筹组一个大型party－－自由欧洲联盟（EAF）。EAF得到唔少欧洲极右政党支持，包括马林勒庞嘅国民阵线、怀尔德斯嘅自由党、奥地利自由党（FPO）、意大利北方联盟（LN）、比利时佛德兰斯利益党（LB）等。不过，值得留意嘅系，呢个联盟系以个人而非政党为单位，所以又有传媒叫EAF做“马林勒庞－怀尔德斯同盟”。
欧洲大陆入面，无论系法国、德国、意大利同奥地利，都开始有一个右倾浪潮席卷议会，佢哋都打住相同旗号，对抗全球化、对抗欧盟、对抗媒体，最最最“重要”，又或者“吸票”就系对抗移民，尤其系来自中东及非洲等地嘅移民，指责佢哋会威胁欧洲文化。
以下呢三剑客都分别比人称为特朗普，“法国特朗普”马林勒庞、“荷兰特朗普”怀尔德斯、“德国特朗普”、另择党嘅党魁佩特里（Frauke Petry）。虽然比人话似特朗普都几侮辱⋯⋯但事实上佢哋都以特朗普为目标，希望得选民垂青，立于政坛顶点。
剑客一号暨Party主办人：德国AfD另类选择党佩特里
德国要右转，唔容易呀。正所谓“真嘢唔好片”，闹人法西斯真系唔好闹着德国人，德国长久以来因为纳粹历史而对民族主义、国家主义都敬而远之，但今日多得特朗普主义滋养咗右翼主义，连由默克尔婶婶领导嘅左胶大本营德国都有右翼政党冒出，佢就系呢个右翼party嘅主办人，来自另类选择党（AfD）嘅佩特里。
▲ 你呢个法西斯！（GIPHY）
虽然以佩特里2月民调中嘅8%得票率，并唔足以喺短时间内发起德国脱欧公投，但佢哋喺今年9月德国联邦议院选举中，就极有可能获得议会入场劵。如此一来，另择党就会成为二战后，第一个成功上位嘅极右政党啦。另择党最犀行嘅系将成“极右”呢个本身唔存在嘅定位加入德国政治光谱之中，连默克尔婶婶都要收一收敛佢对穆斯林移民嘅大爱之光，推出禁制穆斯林妇女身穿“波卡”（burqa）传统罩袍、加快遣返有案底难民嘅速度、2020年前加聘约1.5万名警察等反恐措施。
唔系飞云话佩特里系“德国特朗普”，有美国媒体都系咁形容呢位41岁、又做嚟再做妈妈嘅佩特里。除咗对移民态度同“侵侵”一样，就连对俄罗斯的态度都好似特朗普咁亲切。例如佩特里话希望同俄罗斯总统普京尽快见面啦，“整个欧洲都需要同俄罗斯建立良好关系”。不过，特朗普团队因“通俄”丑闻而搞到一身蚁，佩特里就好型咁话佢嘅党员已经一早同克里姆林宫的官员会面，乜事都冇。
▲美国《新闻周刊》早前就以“德国特朗普”佩特里为题作报道。
延伸阅读：默克尔大选前夕政策转弯 加快遣返难民 送钱利诱自愿离境
更值得一提嘅系，集会入面有群聚向记者大叫“Lügenpresse！”（大话媒体），呢个字系当年德国纳粹常用嚟指控媒体散播与自己为敌嘅说法－－咁讲可能易明啲，姐系好似有一个团体，无啦啦周围闹人系“小资产阶级”咁，回到毛主席怀抱咁款呀！呢个字更加出现过喺特朗普竞活动集会中，佢嘅支持者宣泄对主流媒体“抺黑”亲爱的侵侵。
除此之外，佩特里仲想创造一个围威喂嘅感觉，鼓励用一个隐语“Völkisch”，意思系“种族纯化状态”。而偏偏呢个隐语就来自纳粹时期嘅官方报纸《Völkisch Observer》，佩特里9月时曾经喺电台访问话要为“种族纯化”平反：“我哋要努力比返个正面嘅内涵意义佢！”。唔难想像，佩特里此话一出，系社会引起极大回响，“黑都被佢讲到白”就系大部分人嘅反应。
隐语只有特定团体先明白，用意系咩？2008年嘅德国电影《白恤暴潮》（The Wave），就示范过呢种营造出一个小圈子感觉嘅行为有几危险。
戏中老师想同学生探讨何谓极权，何谓纳粹，又指喺呢个自由民主嘅时代，德国唔可能再出现极权政治。老师就同学生嚟咗一场短短5日嘅实验：著制服、行礼、用党徽、依成绩分配位置－－冇错，即系纳粹in廿一世纪中学，而结局就唔剧透，但可以讲，用隐语同著制服，一样系想营造一个身分认同，“只有属于团体入面嘅成员先系咁㗎”嘅优越感。佩特里嘅玩法，相信都呼之欲出啦。
剑客二号暨输少当赢哥：荷兰自由党（PVV）怀尔德斯
荷兰大选结果新鲜出炉，虽然怀尔德斯率领嘅自由党（PVV）喺今次荷兰国会大选入面失落最大党之位，现任首相吕特（Mark Rutte）嘅自民党（VVD）继续冧庄，但怀尔德斯比上次大选攞多咗5席共20席，已经系第二多。话就话个个都话明唔会同自由党合作筹组政府，但怀尔德斯都好乐观咁讲：“我喺到㗎，可以嚟揾我倾组阁㗎！”
怀尔德斯被称为“荷兰特朗普”，代表佢痴线⋯⋯sorry，激进嘅程度同特朗普有得fight啦，但亦有政治系教授认为，佢同特朗普其中一个好唔同嘅地方，就系佢其实系有脑嘅。
▲脑是个好东西，希望大家都有。（GIPHY）
众所周知，特朗普个Twitter同初中生冇咩分别，特朗普比媒体批评果阵，就即刻出个Tweet点名话边个边个，“衰人嚟㗎！”但怀尔德斯每个post都经过计算，同冲动派嘅特朗普完全唔同。
三剑侠入面，怀尔德斯针对穆斯林嘅程度真系一枝独秀，而佢嘅支持者就系钟意佢够“真性情”，呢一点同特朗普支持者都几相似，觉得佢哋唔同“一般政客”咁避重就轻。
延伸阅读：【荷兰大选】“特朗普主义”塑造者怀尔德斯 打响欧陆极右前哨战
“荷兰再负担唔起伊斯兰教，我希望咁法西斯嘅可兰经被禁。”
“呢本摆喺你面前嘅可兰经，就系恐怖分子嘅手册。血由佢嘅书页流出嚟。号召一场对抗非信徒嘅永不终止嘅战争。呢本可兰经对穆斯林嚟讲就系捕猎许可。一张杀人嘅许可。”
“我哋入口咗一只怪物，称之为伊斯兰教嘅怪物。”
怀尔德斯对伊斯兰教嘅怨恨，甚至出过书：《死亡印记：伊斯兰教对抗西方与我的战争》。
怀尔德斯“今日的我打倒昨日的我”呢个伎俩已经玩到炉火纯青，透过讲啲比自己以前更偏激嘅说法，吸引群众注意。就好似佢2012年就话，“荷兰唔要再有新清真寺！”而家变咗“关闭所有清真寺！”，2012年就话“限制每年1000个难民！”，无啦啦又变埋“唔要再有新难民！”
▲ 唔好痴埋嚟啦好吗？（GIPHY）
不过，荷兰大选个玩法就系要“埋堆”，怀尔德斯即使得到大选最高票，但佢都冇法子做总理，因为其他政党一早讲咗唔侵佢玩，唔会比佢“埋堆”组成联合政府执政，咁都唔代表佢得票高绝无意义；怀尔德斯将主流右翼推得更右，例如开始有右翼政党主张对移民实行更严格限制，同埋逼使移民融入荷兰文化等。
延伸阅读：荷兰大选自民党保第一大党地位 荷版特朗普认输：做坚实的反对党
剑客三号暨最大希望：法国国民阵线（FN）马林勒庞
当大家望到怀尔德斯被重挫，掩住半边嘴笑嘅时候，都不忘望向法国嘅马林勒庞，法国大选第一轮投票就系一个月后嘅4月23日，到底极右会否成功喺欧洲大地开花？
马林勒庞团队喺怀尔德斯败选后都马上出嚟攞返个尾彩，就叫人唔好过份阅读荷兰大选，话法国嘅情况不可同日而语！又话马林勒庞比起怀尔德斯嘅自由党好明显准备工夫做得更好，目标更明确⋯⋯哗果阵你哋唔系好friend咁自拍㗎咩？
原本法国民调就显示，马林勒庞预计会同立场右派嘅法国共和党（Les Républicains）候选人菲永（François Fillon）嚟一场右vs极右嘅单挑，不过菲永个衰佬唔生性，连环爆出丑闻，包括请晒老婆仔女一家做助理白𢭃人工。令中间备偏左嘅前经济部长马克龙（Emmanuel Macron）渔人得利。
今次怀尔德斯失落最大党之位，马林勒庞团队就指系荷兰首相吕特最后“尽地一铺”，同土耳其总统埃尔多安因为宣传修宪活动而闹翻，先成功抢返部分选票，而法国大选就唔会出现呢一种加分位。
延伸阅读：大选前夕与土国交恶 荷首相吕特要扮强人 埃尔多安怒吼制裁荷兰
▲ 马林勒庞选情大勇，有几咁多狂热嘅支持者。（GIPHY）
“2016年，盎格鲁－撒克逊世界觉醒了！”英国脱欧同埋特朗普当选两件英美世界嘅大事，令马林BB兴奋到要大叫：“2017件，我肯定会系欧洲大陆人民站起来嘅一年！”马林勒庞曾经形容过脱欧系继柏林围墙倒下后，世上最重要嘅事件，而特朗普当选美国总统，更加系“建设新世界一颗额外嘅基石”。哗，咁有邪教风味嘅⋯⋯但偏偏就有好多人对呢个邪教心悦诚服。
作为极右嘅马林勒庞喺出名“左”嘅德国第一个公开演说，的确系好大胆。一直以来，政客都相当抗拒同激进派同排外主义者行得太近，怕烧埋自己果叠嘛。但今时唔同往日，而家嘅欧洲政界，已经不以极右为耻，呢一日三剑客同台，其实代表住佢哋意识上嘅结盟。
▲ 已经冇人可以阻止到我哋3个啦！（GIPHY）
呢三剑客其中一个特点就系对于移民态度非常齐心，马林勒庞就认为移民“完全冇理由留喺法国”，因为由佢哋一踏足法国果一秒已经犯紧法！而马林勒庞亦喺新一年嘅集会中再次更新移民政策，承诺大规模削减合法移民数字，法国国民身分咁矜贵，“达阵”系唔够嘅！只可以系继承自父母，或者被赋予。
回想起一开始马林勒庞系几咁受万人唾骂，个个都对佢敬而远之，但到咗今日，甚至有法国学者表示，国民阵线同其他政党之间嘅界线已经越嚟越模糊。右翼喺欧洲越来越大势力，三剑客变五星战队，变埋AKB48都有机会添呀。