【迷】激突牙肉妹被网民激赞好丑　刘思希：睇到都觉得感动

出身港姐的刘思希自入行6年以来，所演的角色大多都是千金小姐，给观众的印象都比较离地。正当差点成为“御用千金小姐”之际，她在TVB新剧《迷》入面饰演来自内地的小红，返到香港寻找金刚饰演的“克仔”。刘思希在剧中除了满口乡音，更以激突牙肉Look示人，有网民睇完即刻表示：“同李笑好（汤盈盈）有得挥！”、“就咁睇，佢真系好丑！”、“佢同金刚真系好衬。”

被人话真系好丑，刘思希第一个反应就系开心：“咁我本身做丑女吖嘛，做得丑即系做到本身角色嘅要求！”能够丑出新境界，刘思希话因为做丑女完全冇包袱：“有几可真系会当街撩鼻屎？今次做呢个角色我都放低咗好多，而且真系好好玩，系一个好贴地嘅角色，对我来说是一个挑战。”丑到有人赞，背后都总有啲代价，刘思希自爆扮丑的辛酸：“初时我戴假牙肉戴到流晒牙血，加上戴住讲嘢不停流口水，我好担心效果会唔好，但好在牙肉有弹性，慢慢都适应咗，最后都搞得掂。”

最初刘思希好担心做内地人，又要扮到激丑，观众会接受不到，怕被他们围插。如今可以逃出“御用千金小姐”之名，但被人赞做到丑的感觉，刘思希会否怕跌另一御用之名，长期都要做丑女？刘思希极爽快表示：“御用就好呀，真系好好玩。有好多丑角都做到好出色，就好似苑琼丹，佢之前做嘅‘低B琼’、‘石榴姐’，做到大家都会记得，而且成为了经典。我觉得一个正常女仔要去变丑，系专业表现嚟。”所以她希望日后有几丑做到几丑都冇所谓。

过去6年做的角色都好似不太出众，如今以“小红”的角色跑出，刘思希会否觉得扮丑先会有人注意？她坦言：“其实见到网民有反应，都会觉得有种苦尽甘来感觉。系有感动嘅，因为之前每个角色都好努力去做，但出到来效果冇咁好，付出唔成正比系会好Hurt，但今次见到网民有讨论小红，自己睇完留言都有眼湿湿，都好多谢监制。我知道自己演技唔系太好，但我都会继续努力。”希望刘思希将来会遇到更多好角色吧。