【每逢大事讲故事】推理迷慎入 金正男毒杀事件之谁是真凶？
网上流传一个故仔，话说朝鲜已故领导人金正日临终前同即将接替自己嘅金正恩讲：“仔呀，我惊我走咗之后，啲人唔听你支笛呀。”金仔胸有成竹咁话：“唔使惊㗎爸B，佢哋一定会跟我𠮶套㗎。”“点解你咁有信心呀？”“因为如果唔跟我，咪送佢地去跟你啰。”
故仔系真系假唔重要，反正朝鲜所有真新闻假故事都系咁奇情。最重要系结果，韩国情报机关估计，2011年金仔正式接任，上场五年来为咗肃清异己，杀咗340人，大概系全部送晒去跟爸B；最近获送一程嘅就系同父异母嘅大哥金正男。
知你想讲咩，净系睇埋晒啲美帝媒体，就将又可爱又仁慈嘅伟大领导人，塑造成麻木不仁、弑兄嘅大魔头，公平咩？
的而且确，而家仲未查清系边个做，只系美国深信系金仔狠下毒手，韩国方面当然都系将矛头指向佢；朝鲜方面未有回应，不过就算回应你又信唔信？
想知更多金正男毒杀事件资料？入嚟：专页：女特务毒杀金正男 金正恩长年谋划杀兄 朝鲜恐怖统治实录
呢件案扑朔迷离嘅程度，有如密室杀人事件，要解开谜底真系要请柯南上身：“真相永远只有一个！凶手就晌我哋当中！”
杀人要有动机，而家疑凶有4个。原来2月16日系爸B金正日75岁冥寿，全国上下都有纪念活动，彼德罗夫博士话晌呢个重要日子前，正男哥哥就被杀，凸显金仔无远弗届嘅权力。研究朝鲜问题专家彼德罗夫博士（Leonid Petrov）认为最有嫌疑嘅应该系朝鲜。
4大嫌疑犯...
想知点解朴槿惠要转移视线？入嚟：【朴槿惠遭弹劾】解读崔顺实干政黑幕：异端教派、神秘的三星
身处朝鲜为献媚杀人，黑帮为商业利益杀人，朴槿惠政府为扰乱视线杀人，呢啲大家都可能明白，但金仔系为咩要杀咗正男哥哥呢？一家人闩埋门有咩唔啱倾到啱啰，不过金仔唔系咁谂。
原来爸B最初都系属意由正男哥哥接任，朝鲜元老个个当正男哥哥系太子；喺朝鲜，大家都仍然系奉行长幼有序传统礼数。虽然正男哥哥后嚟因为想去日本迪士尼玩而被爸B视为投敌，又学埋晒啲资本主义邪恶思想，所以降呢为“废太子”，但大哥始终系大哥，金仔对佢始终有啲忌讳。
🔺正男哥哥因为（个仔）想去迪士尼，而用假护照入境日本被补，迪士尼的确系好吸引嘅。（Youtube）
加上有传爸B曾经“临终托孤”，《朝鲜日报》2010年报道，话爸B怕佢两兄弟权斗，所以要求当时嘅中国国家主席胡锦涛保护正男哥哥，胡锦涛应承咗。彼德罗夫博士话，中国一直视正男哥哥系潜在接班人，谂住金仔有事就由正男哥哥顶上，又认为正男哥哥会为朝鲜带来改变同埋改革成市场主导，系中国、甚至日本都乐见嘅；呢几年中国都有好好锡住正男哥哥。
虽然正男哥哥已经系废太子，但都有中国撑腰，相反已经登基嘅金仔，不时都要睇中国嘅面色，金仔梗系唔顺气啦，咁父慈子爱呀嗱，送佢去见爸B！
不过呢啲都唔系最根本嘅原因，如果要了解金仔嘅内心世界，首先要回带睇睇金仔年幼时......
当年嘅金仔，点睇都只系一个天真可爱嘅小朋友。
朝鲜官方话全能嘅金仔3岁识开枪（唔系水枪）、识揸车（唔系三轮车），6岁识骑马（唔系木马），仲要骑得好过骑师，冇运动唔识，特别系篮球，打得好过一般职业选手。好似佢啲咁出色嘅男人，无论晌咩地方，都好似漆黑中嘅萤火虫一样，咁鲜明，咁出众！
🔺金仔的确系有一种独特嘅气质。（Youtube）
咁出色嘅人有一份傲气，唔钟意输；金仔身边嘅人都系咁讲。金仔嘅阿姨话金仔12岁去到瑞士，由佢照顾，当时金仔比同龄嘅小朋友矮一截，佢好唔顺气，金仔妈妈就话：“打篮球会长高㗎！”于是金仔就听妈妈话，自此开始爱上篮球。金仔阿姨仲话，金仔真系好钟意打篮球，钟意到要揽住个篮球瞓觉。
金仔阿姨又话，年少时嘅金仔脾气差，冇耐性，不过通常唔搞事亦唔多出声，加上去到外地读书，语言不通，个人就更加静。
生于帝王家嘅金仔，一直非常孤独。不过曹操都有知心友，金仔晌瑞士识到佢个闺密Joao Micaelo。Joao都话金仔份人好静，不过可能只系大家冇尝试去了解佢。当年金仔以假身份到瑞士读书，Joao初时以为佢系朝鲜大使个仔，后嚟金仔可能唔想再瞒住佢嘅好朋友，就同佢坦白：“我唔系大使个仔，我系朝鲜领导人个仔！”
原来佢哋全家人都钟意玩假身份。
🔺“我老豆系宇宙最强！”（Giphy）
Joao同金仔得闲打吓波，讲吓女，系一般年青人嘅生活。Joao话金仔打波都几叻，对于佢嚟讲，篮球就系全世界，除咗打波，打机都要打篮球game。佢话金仔打波唔钟意输，完全体现佢自尊心强嘅一面。
🔺金仔闺密爆料话有次金仔珍藏咗本咸书被人揾咗出嚟，真系年少轻狂。（Giphy）
金家御厨藤本健二，除咗煮𩠌更系金仔嘅玩伴，佢话金仔真系好钟意篮球，至今从未错过一场NBA篮球赛。佢话金仔嘅二哥金正哲好温柔，打完波会同队友讲：“你哋做得好好，大家返去唞唞啦！”但金仔就好好胜，练得唔好会发火闹队友。
藤本话：“有次金仔同亲戚玩游戏，个游戏系攞愈多棋就会赢。二哥正哲望住佢哋玩，金仔想行一步时，正哲就话：‘唔系呢步，系另一步呀。’金仔听从二哥讲，但结果攞唔到𠮶只棋。金仔嬲到即刻睥住二哥，将只棋一嘢掉去二哥面前。”
咁火爆，唔怪得爸B都话：“正哲成个女人咁，都系金仔先似我。”有传正哲荷尔蒙异常导致女性化倾向，所以一早俾爸B剔出接班人名单。
好胜嘅金仔长大成为朝鲜嘅领导人，但佢未放弃对篮球嘅热诚，你睇佢同绰号“变色龙”嘅NBA名宿洛文几咁识英雄重英雄，就知佢都系识波之人。
佢甚至钟意篮球钟意到重写篮球规则，令篮球变得更好玩。包括入樽由2分变3分，3分波穿针变4分，球赛最后3分钟入波计8分，不过罚球射失就减1分。哗，咁边够你玩呀师兄，所以旧年5月中朝篮球赛，朝鲜队凭住高超嘅技术，力压中国国家奥运队，以82：73赢咗场比赛。
嗱，唔准你话朝鲜出怪招先赢到，亦唔准你话中国队因为惊被人送去见金仔爸B而让赛呀！学金仔话：“中朝两国运动员心怀深厚友谊之情，以高超技术进行漂亮比赛，好满意。”
🔺“你估我会俾你赢咩？傻猪！”（Giphy/劳动新闻）
金仔除咗晌球场上唔钟意输，政治上就更加唔钟意输，而且要个个都服从佢。旧年5月至7月期间，金仔去咗视察部队，其间朝鲜二号人物、行年六十有七嘅人民军总政治局局长黄炳誓，竟然右膝跪地并用手捂嘴，多次弯腰向金仔讲嘢说话，对金仔表现得极度恭敬。
坐喺金仔左边嘅人民武力部第一副部长徐鸿赞即刻惊到想弹起咁款，第二把交椅都跪，徐副部长心谂系咪要趴低呢？呢一幕真系令人不安，同时显示金仔要下属完全服从。
大家仲记唔记得，2013年金仔将佢姑丈张成泽，以叛国罪处决？但有人话佢只系遭清算，因为佢同金仔喺治国政策上睇法唔同。人民武装力量部前部长玄永哲又记唔记得？2015年因为恰眼瞓，兼且妄议金仔嘅命令，表现唔尊重金仔，传闻被高射炮处决，相信唔少打工仔都俾呢个消息吓到醒一醒。
大家都见识到金仔几咁狠，知道佢早已经唔系当年天真可爱嘅小肥仔喇，即使金仔落嘅指令几咁荒唐专横，都冇人够胆挑战佢啦，咪一味点头赞好啰，唔系一阵俾佢送咗去见爸B。有咩谏言都系吞返落肚，讲句：“冇咩事我出返去做嘢先。”
金仔咁后生就掌权，冇咩经验，爸B又死咗，冇人可以信，只可以信二哥金正哲同妹妹金与正，要定期同佢哋商讨治国政策。甚至有人话二哥都系金仔心中一条刺，所以金仔只能同妹妹倾心事。王者都系注定孤独嘅。
喺咁嘅状况下，朝鲜嘅政策就更难捉摸，好似金仔喺新年贺词先话要南北对话，改善两韩关系，但过几日又威胁射导弹。而且成日要好似黄炳誓咁跪法都好攰㗎，吓吓点头赞好都会颈痛，金仔专制嘅管治，即系唔啱听就送你去见爸B嘅政策，已经吓到好多人脱北，甚至唔少系接近权力核心人士，可能动摇到金仔嘅政权。
讲到呢度，金仔弑兄嘅动机似乎非常充足，要稳住政权，阻止正男哥哥喺中国支持下强势回归夺权，睇怕都可以揾金田一嚟讲句：“凶手就系你！”
不过朝鲜媒体报道，话金仔知道正男哥哥被杀消息后，佢嘅反应好似佢都中咗毒咁，忽然瘫咗喺梳化上，双眼无神，脸色蜡黄，嘴角抽搐，好几个钟先开始识喊，仲要大喊到第二日声音沙哑。正男哥哥话过，其实未见过金仔，一个未见过嘅人都令金仔咁伤心，金仔真系性情中人！
有熟悉朝鲜国情，即系网民/口痕友，话金仔绝对唔会系真凶，因为呢个时候杀死正男哥哥，国际间就会有借口制裁朝鲜，日韩又会攞正牌部署萨德等等......咁即系又返回原点？
呢件案可能最终都系悬案，因为朝鲜2月中进行北极星二号中程地对地弹道导弹试验，导弹飞行500多公里，跌落日本海，咁样针对日本，柯南同金田一梗系唔会帮你查啦！唔紧要啦，反正朝鲜不嬲都系真亦假时假亦真，以上分析可能最后全部都系错。不过头先讲咗咁多真心话，希望唔会有人送飞云去见金仔爸B啦。
如果下星期见唔到飞云，可以去呢度回忆吓：【新闻讲故事】国际大事一看就懂！中东美俄东亚 趣味养份兼备
🔺谂到呢一点，飞云真系悲从中来。（Giphy）