【每逢大事讲故事】奥巴马又长又谮 最后由主角沦为恐怖片大茄
有研究指，睇恐怖片可以减压，因为观众会将大部分注意力投入剧情，暂时忘记日常生活中的烦恼；紧张过后精神和身体上会有较长时间放松，有助释放压力。
香港即将举行特首选举，香港人日日睇到几位候选人的新闻，或多或少都有些少压力，想放松下不妨试试睇恐怖片。飞云有套正嘢推介，恐怖得嚟又老少咸宜，最重要唔使俾钱买飞入场睇，追住《香港01》就可以。
这套戏就是《旧年大选搞乜鬼之共和党电锯杀人奥巴马夺命狂呼死神来了》。
上星期美国总统奥巴马的告别演说，加上为副总统拜登泡制的自由勋章惊喜，一幕幕温馨感人的场景，犹如TBB剧集大结局大家一齐BBQ跳起YEAH，简直想高歌一曲“齐欢唱~”。
不过，今个月20日，特朗普将正式成为美国总统，追开美国大选这台戏的观众，可能已经发现，美国人选出特朗普为下任总统，以及选出由共和党控制的参众两院一刻，这套剧早已变调，温馨场面只是暴风雨前的平静，温馨小品已变成惊悚片，呀……呀……妈呀!!!!!!!!!!!!!!!!!!!!
故事回到2014年，当时美国总统奥巴马领导嘅政府同共和党势成水火，好多奥巴马想推嘅政策，由共和党控制嘅众议院都唱反调。奥巴马喺新一年同内阁政府首次开会，嬲嬲哋就表明立场，话自己系唔会咁轻易让步。
“我哋唔系得正正喺度，乜都唔使做，等立法去为美国人提供所需嘅帮助…...我会指示各部门，利用所有可行方法去协助中产阶层。”
佢仲话：“我有一支笔，有一个电话。”（I've got a pen and I've got a phone.）讲明会用支笔嘅力量去绕过唔合作嘅国会，暗示可以行政指令通过法案，处理经济问题。
唔知点解，飞云脑内突然间充斥住奥巴马化身PPAP大叔嘅画面，一边扭动副波地一边唱“♪ ♩ ♫ ♬I have a pen. I have a phone. 呀！行政指令！♪ ♩ ♫ ♬”
奥巴马好多时都得个讲字，但一讲到行政指令，佢就坐而起行，当正自己系大明星咁起势签名。佢8年间佢签咗260条行政指令，虽然与其他总统相比其实差唔多，但唔少法案都系极具争议性，包括医改、枪管、移民政策等等。
呢个方法咁好使，就好似古代皇上御赐俾包青天𠮶把尚方宝剑咁，直头要攞嚟遇神杀神，遇妖斩妖啦！不过临别在即嘅奥巴马，近日却寄语特朗普，劝佢唔好好似佢咁用咁多行政指令，仲承认：“透过立法程序会好啲，因为难啲推翻。”哗！由奥巴马讲出呢番说话，真系特别有说服力啰。
奥巴马与共和党人唔啱倾都唔系新闻，呢种关系维持咗8年，双方早已积怨甚深。回顾2013年仲曾经搅到政府因为冇钱而停摆，当时由共和党控制的众议院通过法案，将奥巴马医疗改革计划延迟一年，悭番啲钱就用嚟做政府运作资金，即系如果共和党通过预算案，就要推迟医改。
当时民主党梗系唔肯过佢，唔钟意医改一回事（因为民主党其实都有人唔钟意医改），玩威胁就点都唔得。议案去到民主党控制嘅参议院被否决，两党最被都企硬唔接受对方的要求，所以预算案批唔到，联邦政府机构冇钱运作，停摆十几日。后嚟双方有共识调高债务上限，件事先平息咗。
《纽约时报》专栏作家、诺贝尔经济学奖得主克鲁曼都忍唔住话佢哋小学鸡：“世界末日可能就系咁，唔系发生大爆炸，而系纯粹闹交！”
奥巴马喺任内签咗200几个行政指令，当中唔少都系为咗绕过国会而强推的政策。人走茶凉，可以预期奥巴马离任后，特朗普同共和党当然唔会俾呢啲具争议性嘅政策留低，仲唔快手将佢哋连根拔起咩？
各位，过去8年就当发咗场梦啦。
以奥巴马医保为例，共和党人落奥巴马面真系不遗余力。当初奥巴马以行政指令通过医保法案，好多共和党人已经唔妥。而家奥巴马还未正式离任，由共和党控制的参议院及众议院已相继通过预算法案，为国会两院提供架构，撤销奥巴马在2010年推出、引以自豪的医保制度。
▲“冇嘢可以留低！”（Giphy）
奥巴马遗留嘅政策，可以撤销都应该会俾共和党撤销，他亦自然由主角，慢慢沦为配角，甚至是剧中必然会死的角色。相反共和党和特朗普则由被嘲笑、被无视的大茄，一步步登上剧本的核心，退位后嘅奥巴马只能脆弱无力地抵抗狂魔肆虐。
搞成咁，奥巴马都有责任。有睇开美国恐怖片，都会知道这类型的影片有几条黄金定律，其中之一就系，如果个角色懒醒，以为自己好劲，就必然死先。喺美国政坛呢套恐怖片中，奥巴马因为懒醒已经可以死千千万万次。
US News记者卡罗利（James R. Carroll）曾分享一段共和党元老级人马、时任参议院少数派领袖麦康奈尔（Mitch McConnell）与奥巴马几年前嘅故事。话说数年前卡罗利访问麦康奈尔，途中奥巴马打电话俾麦康奈尔，麦康奈尔俾卡罗利留喺办公室，条件系佢唔可以将对话内容写出嚟。通电话由一句＂Hello"开始，然后"Goodbye"作结；麦康奈尔在数分钟对话期间一直面无表情，声调无变化，而且冇叫过一句“总统先生”，成个气氛卡罗利形容简直冻到去咗北极咁。
【专页‧新闻讲故事】国际大事一看就懂！中东美俄东亚 趣味养份兼备
做总统做到奥巴马咁都几样衰，明明总统嘅职责就系团结两党，但偏偏佢就搅到两党不和，政府又停摆，自己嘅政策仲要被推翻。最惨系唔得人尊重嘛，一句“总统先生”都唔叫。原来政界早有传，过去8年两党之争搞到政府做唔到嘢，主要系因为两党欠缺沟通。
麦康奈尔坚称自己对事唔对人，你信唔信呀？开会闹到面红耳赤，唔通平时可以同你老友鬼鬼？
坚称自己唔嬲、但讲过话唔可以俾奥巴马连任嘅麦康奈尔话：“好多人问我奥巴马总统真实系点嘅人，我都讲同一样嘢，佢真人同喺公众场合一样，就系班上面会努力，俾大家知道佢系最聪明𠮶个学生咁，佢经常居高临下咁同人讲嘢，同白宫的同事或者对全国讲话都一样。”
佢又话：“奥巴马总统通常喺严肃讨论政策时，开始都系解释点解其他人系错，他曲解你嘅意思之后，就会好热心咁尝试拆解人哋嘅论证，惊死你唔知佢几醒。”
他形容，同总统对话长到怕，相信麦康奈尔嘅感觉直头好似悟空对住唐憎咁，佢仲话“对付总统，（前众议院议长）博纳出名放低个电话然后同其他人倾嘢；我就唔会喇，我顶多去睇咗一局棒球比赛之嘛。”
▲“系喇系喇至醒系你喇！”（Giphy）
奥巴马自觉样衰，喺告别演说中，叫群众坐低，当时群情汹涌冇人理佢，佢就话：“可见我真系跛脚鸭，冇人跟指令。”引起现场人士大笑；但笑完之后，佢仍然晌演说中提及自己嘅“丰功伟绩”，包括击杀拉登、与古巴复交等等。
刚过去嘅大选中，佢又怪民主党人唔够贴地，先会令希拉里输咗。“民主党人通常被视为自由派精英、叹咖啡、政治正确，但离地......我哋要走入社区，去食炸鱼薯条、去退伍军人嘅聚会、同农夫倾计。”佢认为自己就系咁成为总统。
咪先咪先，总统先生，炸鱼都有平贵之分嘅，你食𠮶啲炸鱼系咪贴地嘅炸鱼先？
老老实实，总统先生似乎仲未明，系佢过去8年嘅玩法，令民主党失去咗唔少分数。2008年金融海啸，的确系佢嘅政策令美国避过更严重的经济崩塌，但佢任内未能检控引发次按危机同埋金融海啸嘅大行高层，国内贫富悬殊问题仍然严重，就算创造新职位，大部份都是临时工同埋兼职。
总统先生仲要成日吹嘘自己几叻叻，咁先系赶客啰，搞到希拉里抱恨未能成为首位女总统之余，民主党又失咗两院控制权。
懒叻嘅总统先生仲要怪自己嘅团队冇做好份工：“我哋嘅政策好正呀，点解你哋唔做好啲去推广佢？”怪人唔做嘢，唔讲系自己政策太理想化，你话，系咪抵死？
做领袖最忌懒醒又唔认错，仲要推啲责任俾人A字膊，我建议总统先生即刻睇《香港01》嘅职场新闻。
介绍番：
▲W创作社《小人国4》职场卸膊操（Youtube）
恐怖片嘅黄金定律之二，就系犹豫不决嘅人，会死快啲。杀人狂魔晌门外，你仲谂紧要唔要著鞋走佬？咁就整定会死啦！
有人批评奥巴马喺重要时间未能行驶领美国嘅领导角色，亦有人话佢嘅失败源于佢尝试干预一啲其实唔系好关美国事嘅外政……简单嚟讲，就重要嘢唔做，到做嘅时候就一时一样。
共和党参议院议员格雷厄姆（Lindsey Graham）就话奥巴马尝试审慎，结果变得犹豫不决，谂得太多结果变成弱点。佢以乌克兰同叙利亚问题为例，话奥巴马政府唔够姜制裁普京，明明全世界得美国可以领头对付普京。
格雷厄姆美国队长上身嘅想法，认为美国系大佬，系世界警察，全世界等美国拯救，呢种说法各位自行定夺，不过可以肯定嘅系，奥巴马喺叙利亚问题上的确系弹弓手，一时话出兵，一时又话唔出喇，懒晒系和平使者小白鸽。
美国媒体对于奥巴马嘅犹豫不决，无咩嘢做到，惟有取笑吓佢。以下呢段短片就系美国媒体眼中的奥巴马总统 ↓
其实2011年叙利亚爆发内战，奥巴马当时已经系美国总统，当初佢话巴沙尔政权必然、也必要倒台，又话过如果巴沙尔对平民用化学武器就系过咗底线喇。Sorry啰，人哋巴沙尔已经用咗化武啦，但奥巴马好似盲咗睇唔到，咩都冇做，亦冇对反对派提供任何协助，任由普京做大佬晌叙利亚问题上话晒事，结果巴沙尔仍然相安无事，生活愉快。
无可否认奥巴马系一个理想远大嘅总统，佢想像嘅公平、和平嘅世界，可以话唔单止美国人，亦系全球人嘅希望。可惜现实系残酷嘅，做得总统就好似有一大堆杀人狂、丧尸、怪兽追住，奥巴马keep住好天真好pure咁，可能只适合演《爱回家》。
▲欣宜名曲：“在世间不声不语有一种爱，柔韧到叫铁石种出花开~”（Giphy）