【转载】新界西人绝对系一群坚毅嘅物种

同冬天用电热水炉冲凉一样，住得新界西，基本上都系一个都市传奇。
首先住到咁远，就会学识时差唔一定出现于国与国之间，新界人嘅一日，永远都早啲开始，夜啲结束。

文：逆行＠电视汁捞饭

时差出现在新界人身上

当大部分返九六嘅奴隶仍然在梦里边畅游，住新界嘅可怜虫已经喺巴士站，迎着寒风作出无尽嘅等待。无论系元公定屯公，明明佢叫高速公路，但汽车嘅步伐就讽刺地同香港人买楼嘅期盼一样，每日都停滞不前。呢个时候可能会有平权人士弹出嚟“香港仔隧道都系咁啦！”无错，好多路都会塞，但细心一想，塞完隧道就出到港岛，附近系铜锣湾、金钟呢类文明世界，大厦临立嘅市区，公司可能就喺附近；但新界？当你辛辛苦苦挨完条长青或者大榄隧道，你面对嘅仍然系一片荒芜，货柜码头？高速公路？如果突然内急，你连揾个厕所嘅机会都无！哀伤嘅感觉有如几经努力读完大学攞到张沙纸，以为自己可以出人头地，到头来只系原地踏步，前路茫茫。

“搭地铁丫嘛！”就好似叫你等多班车或者努力增值下自己一样，难听过粗口。先唔计西铁已经逼到PK，有啲已经失心疯嘅朋友为咗一个位， 可以由天水围搭返两个站入屯门再由屯门搭返出红磡，等等，希望大家唔好叻唔切，西铁嘅两个站，同地铁嘅两个站，系唔同嘅。果四个站嘅牺牲，唔系咁易㗎，所以有人提倡让座，你知唔知人哋为咗呢个位付出咗几多？再讲，唔系话唔想让，但莫讲话坐位，连企位都未必有，朝早8点去到锦上路你仲上到车，同元公或者屯公无塞车一样，已经好似李斯特城赢到英超咁兴奋。

“其实Google map话好快啫…”究竟有几多人真系会用Google Map嘅suggested routes？我唔知。因为佢就好似政府呃人去读副学士或者进修，然后话有好多出路一样，得过讲字，有时啲路线睇完都想笑出嚟，新界尾出去九龙头又入返新界尾，究竟系咩逻辑，再者，仲未计塞车等车嘅时间。

阿妈话以前见工听到你住新界西，一定唔想请，但如果我系雇主，知道有新界朋友嚟见工，无论公司喺边我都会请。因为经过住新界嘅磨练，呢位员工仲有咩克服唔倒？

喺元公同屯公锻炼出异于常人嘅耐性，你话个客好烦好难凑，有咩烦得过塞车要等半个钟先行完果几百米；你话OT辛苦，份工要成日企，有咩辛苦得过由7点45分企到8点45分而架车仲不断摇嚟摇去，个脚力已经升到S级；你话要最好有啲经济知识，西隧同红隧嘅替代品原理加上政府介入价格限制嘅祸害，有边个喺红磡转隧巴嘅新界人唔了解？

如果真系有小朋友跨区返学，细细个就已经可以练出一番横炼筋骨加上不屈不挠嘅志气，大过唔飞黄腾达都至少可以拯救地球，攞诺贝尔奖都只系基本。

夜晚放工先系新界人最大嘅考验

而除咗要早啲返工，夜晚放工先系新界人最大嘅考验。

你可以试下问住新界嘅同事，佢地有几耐无睇过《爱回家》，虽然其实都唔系好想睇，但如果可以做家访，新界西嘅家庭应该会系：“阿女，做咩又笑又喊呀…”“无…返到嚟《幕后玩家》仲未开始做，有少少感动…”据非正式统计，新界西人睇MyTV嘅比率应该系最高。欧洲美国有Winter Time，香港工时根本就应该有新界西Time。

如果系返工之后有gathering，更加系煎熬。当住九龙、港岛嘅朋友返到屋企冲晒凉上埋床，住新界西嘅朋友可能仍然喺美孚或者尖东行紧果条为竞步赛而设嘅走廊，亦可能喺大榄隧道架巴士入面企紧。若果有呢类朋友，你尝试约佢喺铜锣湾或者旺角食饭，而佢又成日唔参与或者甩底，应承我，体谅佢，因为只要你真系入过屯元天，你就会体会到果份孤独。无论喺西铁定巴士，你都会见到呢大堆人，好似吸咗麻醉药咁昏迷咗，瞓到东歪西倒，或者不断㩒电话，如果我系电讯公司，无限数据嘅推广我一定摆晒喺新西。

但系唔好误会，大家瞓觉或者玩电话并唔系真系因为攰或者怕闷，而系因为当你离开旺角或者美孚呢啲所谓嘅闹市，当巴士在公路上奔驰，西铁于漆黑隧道中疾走，望住不断后退嘅街灯同埋无尽嘅黑暗，你看到的不是晚归，是绝望。明明只系千几平方公里，但呢片弹丸之地就划分成两个世界，睇到呢到如果你仍然话“车…大陆呀外国呀都好多人系咁啦”，你唔明。当人人如是，面对同一样问题，就不用如此伤春悲秋，但住新界又要到港岛工作，就正正经历着犹如贫富悬殊嘅鸿沟，社会不平、M形建构嘅压抑，望住太古城和港景峰的同事，你无言以对。 为咗避免呢份悲伤同抑郁，只好逃避于梦境或者虚拟世界之中。

呢个地方真系特别西

最后，你会发现新界西人特别多愁善感、胡思乱想、忧国忧民，只因他们就是一班受尽压逼、不公和欺压，但仍旧努力，安分守纪嘅一群。“愈有钱嘅人就愈玩嘢呀！点解我要住到咁远呀？！”许文彪嘅呼叫经常喺佢哋耳边响起，但佢地无随之和应，亦无半句怨言，只会继续默默每日好努力咁搭两个钟头（or more）车，来回地狱又折返凡间。

啲人成日笑问，“新界系咪仲有好多人养牛㗎？”新界人真系会答“系呀，好多㗎！”咁讲唔系搞笑或者敷衍了事，因为我哋心知，自己就系果啲牛。

新一年，好多人会话要“珍惜眼前人”，识珍惜，一定系珍惜住新界（西北）仲会出嚟见你、食饭聚会或者（准时）返工嘅朋友，呢堆坚毅嘅生物，根本要列为香港七大奇观，加入健力士世界纪录大全。

叫得“新界西”，地如其名，呢个地方真系特别西（地理上）。

【编按：本文获作者授权转载，原文刊于作者Facebook专页。】

（本文纯属作者意见，不代表香港01立场。）