【每逢大事说故事】Hehe浸温泉　安倍想要北方四岛　村民又点谂？

踏入十二月，又到谁骑着鹿车飞过的日子。天寒地冻，尘世间最爽既事莫过于与爱人浸住温存……sorry系温泉，肉帛相见，卿卿我我，而且！你并不需要首先有一个女朋友！就如安倍与普京，两个麻甩佬，一泡热水，眼里只有彼此。

今次两国元首面谈，唔单止肉帛相见，安倍仲带埋人返乡下，喺山口县温泉旅馆大谷山庄度过温馨夜，又准备一堆经济合作条约。讲金又讲心，家下仲抛晒个身出黎，到底安倍有咩要求？出发之前，安倍讲到明想讲北方四岛问题，普京就讲到明无得倾。北方四岛，我细细个就听过呢个名，但到底系咩东东？

　北岛定南岛　呢啲都系相对嘅

呢个问题问得真系好，飞云都好乐意解答你呢个问题啊喵！话明北方，都真系北过北海道；话明四岛，就系国后、择捉、齿舞、色丹四个岛。但学爱恩斯坦话斋，呢啲都系相对嘅：对日本嚟讲就话北，对俄罗斯嚟讲就相当南，所以人哋就叫果边做南千岛群岛。

　在水中央　地大人少鱼多

呢四个岛，又北又南又在水中央，一年300日都落雨落雪。四个岛入面，最多人果个择捉岛都系得8000人，而且大多数属俄罗斯人。缺资源缺电，航班船运都乏乏，简直好似柯南果啲与世隔绝嘅凶案现场。都不特止，医院又少，又无大学，反而鱼就特别多，所以居民平日就捕吓鱼，放下牛羊咁。

　资源丰富　位于要道

但千祈唔好睇少呢啲天然资源，四岛渔获丰富，专家估计年水产品达200万吨；地底又有石油、黄金、白银。而且地段仲好优越，水深港阔，系俄罗斯向太平洋嘅重要出口。想当年偷袭珍珠港，日军就系喺择捉岛集结部署。而家北方四岛由俄罗斯管，对佢哋嚟讲，又真系几正嘅。之但系，你钟意姐，啲村民系咪咁谂，你哋有无问过！

　伤害民族感情　呢啲好大镬

话说北方四岛近日本，居民着嘅用嘅都系日本货多，街上面行嘅都系日本车，但居民就唔多想“回归”日本㖞，或者都同岛上俄罗斯人多有关啦。飞云才疏学浅系无问过村民，但《经济学人》就问过俄罗斯人，发现78%都反对“割让”北方四岛。咁呢啲土地问题，好多时都系尊严问题嚟嘅。俄国人觉得，北方四岛系俄罗斯二战胜利象征。你知啦，一讲到伤害民族感情呢啲嘢，就好难有计倾，所以咪搞成咁啰。

　近两万同乡流落北海道

岛民就咁睇，日本人又点睇？德野宏（音译）今年82岁，同1万7000个北方四岛同乡一齐流落北海道，成日都想返乡下。想当年1945年9月1日，苏联军登陆色丹岛，果时岛上面仲有唔少日本人，德野宏系其中之一。“我以为我哋会死啊！”但德野宏唔单止无死到，仲学埋俄文，但就畀俄罗斯人送返日本，一去无回头。

　剧透警告：下面条片有女睇

老人家就当然想落叶归根，但除此之外而家日本右翼团体都好想收返北方四岛，日本政府亦设有北方对策部，而且定每年2月7日为北方领土日，亦会有啲广告讲吓日本同北方四岛点血浓于水咁。有无人理呢，飞云就唔知喇。

得两个镜头我都知你好失望，但唔紧要架我唔mind。

　来简约地争多70年　态度未曾改变

两国争夺呢几个岛仔都争咗好耐，最远讲紧十七世纪就开始争。争争吓到十九世纪，两国签咗《下田条约》，正式将四岛归入日本所有。本来四岛上面都住咗万几个日本人，点知到二战果时，美国英国拎住北方四岛当饼仔，谂住分畀苏联氹佢入局，一齐打日本。The rest is history，日本输咗，苏联就袋左四个岛。

　我要嘅系4条A！

话说苏联都唔系无话过畀返啲岛日本，但呢4个岛，就好似苗侨伟果4条A，对日本嚟讲无咗两条都唔得。本来两国由战后一直倾到1956年，当年大家都同意先交回齿舞和色丹，但苏联话国后和择捉唔需要还。咁日本就唔制啦，大佬我四条都畀你搞到变无料，留对啤喺度算系点。所以日本同俄罗斯到而家都未签战后和平条约。

　无限期免息分期都无得倾

4条A嘅问题，一直留到依家。2000年普京啱啱上任总统，同日本倾，日本依然坚持“先还一半，其余分期”嘅原则，虽然话放宽到无限期免息分期，但俄罗斯依然回绝。

　同普京冲凉　为战斗民族送上柔情

百世修得同船渡，千世修来共枕眠，但70年就修来同冲凉——都唔知系积福定作业。时至今日，两个麻甩佬一齐冲吓凉浸吓浴，唔知会唔会擦吓背，为战斗民族送上柔情暖意，普京入旅馆前嘅说法系“希望唔好搞到咁攰”，嗯……飞云都唔想谂太多。但如果有人讲起，十二月真系难过嘅月份，请你谂住同普京冲凉，就会发现，其实一个人都无咩可怕姐。