一秒拳王｜魔鬼教练梁博恩坚持跟足拳法　周国贤：未试过咁辛苦

热血打拳电影《一秒拳王》由ToNick成员赵善恒自编自导自演，同场更有周国贤（Endy）、张建声、泰国小鲜肉《出猫特攻队》Nonkul、林明祯，现时票房已冲破400万，票房成绩的确得来不易，当中有份训练众人的动作指导的梁博恩中前接受《香港01》访问，他都有讲拍摄过程中的辛酸。

其实日前恒仔出席《#PTGF出租女友》时，笑言拍《一秒拳王》时非常辛苦，著记者一定要问下教练梁博恩：“点解𠮶时要咁糟质我哋啊？”今日记者致电梁博恩，其回应爽直有力：“唔糟质佢哋点会有而家嘅成果呢～哈哈！其实一开头都系当佢哋正常学生咁教，出拳、步法，不过后来都系因为唔够时间，得返两个月时间，所以要当佢哋真系出赛拳手咁去操，大家喺片尾见到嘅铁皮屋其实喺天台上面，每日上去都要先行6层楼梯，已经热好晒身，呢间铁皮屋真系为佢哋而设，真系地狱场所嚟。”

点解会称之为地狱场所呢？恒仔透露：“其实第一次上去真系晕低，因为特登唔开冷气，又要花好多体能，真系会抖唔到气，加上好多时间我哋一路度剧本动作，本来都只系坐喺到，度度下就话起身嚟试下喇！就又开始打架啦！”而梁博恩就讲到当时真系好热，同埋再将佢哋由0操到100真系要谷到尽，他都有试过跟恒仔一试在擂台上真正打一次，好让他感受一下，他：“其实佢哋已经学咗好多，不过到真系要打个阵未必转得切，所以会乱、惊同埋唔习惯。”

周国贤最有打拳天份

至于问到边位学生最好又有边位差一点点时，梁博恩大赞：“Endy好好，佢真系好有天份，可能佢又白纸一张，加上又好信任我，真系叫佢做咩都照做又做到，阿声（张建声）就差啲啲，因为佢初嚟个阵因为上一部戏所需身型问题，较为重同迟钝，入面有个镜头佢乱打，反面Endy好纯熟咁避开晒，不过Endy一开始已经受咗伤，某程度上对佢嚟讲都有唔少难处。”

梁博恩续指出：“本身大家见到Endy都系好瘦，佢真系好努力谷尽晒出嚟，又要增肌、饮蛋白粉，佢真系好厉害，佢自己都话‘咁大个仔未试过挨得咁辛苦’，呢班男仔有样好，佢哋又唔会顶唔顺，反而一大班一齐操，有时仲会斗做得多，你做十下我就十二下，真系好有心！”

唔会随便放过佢哋

梁博恩跟一众演员打成一遍，同出同入，一齐挨过咁刻苦的操练，问及他有冇因此而放过一班大男孩时，他：“我好执着呢啲细节位，拳法要打得准打得啱先可以过关，观众都会识睇、识打拳，绝对唔可以求其。而且监制都有俾压力我架！要佢哋一定有腹肌，影相先会好睇，仲好记得阿声戒得最清，仲着住胶衫焗汗去操，务求早日成功修身。”

林作有机会赢

近日林作、钟培生9月举行的“林钟一战”拳赛成为全城热话，问及梁博恩觉得林作有否胜算时，他：“勤力操会有机会嘅，钟培生本身有底子，林作想赢一定要加紧训练，知道佢揾咗向柏荣做教练，师傅都一定会有一套拳法去对付对手，有得打嘅。（身形点先会有优势？）当然高大会有优势啦，比如你出拳伸直手都会先击中对方，加上你嘅身型同埋反应都好大影。”