《太阳的后裔》大结局　男人黑暗岁月终于重光

日日睇都系《太阳的后裔》，烦唔烦呀？（另一编辑嬲嬲猪按：剩系睇到呢句都知写呢张猫纸嘅，系男人定女人。）最惨系一众好男人。日头返工做奴隶，以为放工可以同伴侣分享一丝温柔，点知老婆女友夜晚时段虽身在香港，心已跟咗仲基去韩国当兵，兼投入幻想下自己系慧乔。网上流传“丈夫守则”，叫你唔好阻住老婆追剧，隔天都不要烦老婆，就算重播时段都要 keep 住低调啲，总之不要低估“宋仲基效应”云云。可想而知，为人丈夫，有时真系有苦自己知。

为咗打救一众麻甩佬，点都要了解下发生咩事。《太阳的后裔》离不开韩剧情情塔塔、生离死别嘅大旋律。故事讲述特战部队组长刘时镇（宋仲基饰）和医生姜暮烟（宋慧乔饰）在韩国和派兵地区之间往返相爱的故事。一次意外，多多误会，成就二人一见钟情。但系师奶剧又点会咁简单？刘时镇拍档徐大英（晋久饰）同埋军医尹明珠（金智媛饰）恋人参战。原来尹明珠读书时畀姜暮烟撬过墙脚，深深不忿。然后大家又发现军人同埋医生的信念南辕北辙，于是，理性与感情交战，离离合合，飞来飞去，死过翻生……最后（比 TVB 高质的）天台 BBQ 大团圆。

好啦，家阵韩国𠮶边 终-于-大-结-局，计埋特摄，最多 19 集，黑暗尽头终于出现曙光！

其实，剧情唔重要，你留意一下，老婆女友感动位，多数系宋仲基徐大英关怀女友嘅小甜蜜。所以，返到屋企，花多少少时间关心伴侣，得闲帮佢绑下鞋带、扎下辫，再深情一句：“我希望你不要受伤”或者“你过得好吗？”相信好快就唔会得太阳先有后裔架啦！

延伸行动

陪老婆女友睇埋《太阳的后裔》大结局，保持恒久忍耐，偶尔背返一两句经典对白，保证冧冧猪。

咩话？直情一集冇睇过？是时候补习了，睇下面，唔该：