作为一个女人，我谂我明点解Stephy同方力申会分手…

我唔太觉得系方力申偷食引致分手。我更相信系两人价值观越来越远…

今日应该好多人都讨论紧方力申同邓丽欣分手呢件事。金童玉女讲分手，大部份人都表示惊讶、可惜。但我作为一个对Stephy有情意结的人（我知Stephy唱歌唔系特别好，演技又未够，但童年回忆呢家嘢…好难讲），总之，作为一个经常留意小方同Stephy新闻的人，我真系……一早预料到呢个结果。

其实由Stephy发展时装事业开始，两个人出席活动时就越来越貌合神离。

唔讲乜嘢“女尊男卑”老土嘢，我亦唔太觉得系方力申偷食引致分手。我更相信系两人价值观越来越远──Stephy专注事业：唱歌、拍戏、时装生意、组织排球队Loey Volley……仲边有时间拍拖？

上年TVB有个旅游节目叫《蜜月到访》，每集王祖蓝同李亚男都会请一对情侣朋友去旅行、倾偈，其中有几集就系方力申同Stephy做嘉宾。好记得去到节目尾声，主持问两个人几时结婚，佢地即刻面色一沉，支吾其词咁话一直都无倾过结婚，方力申半带讲笑话：“系呀…女人事业好紧要㗎…唔好放弃！”镜头一转，Stephy一个无奈样，叫小方“正经啲得唔得呀？”去到呢个位，心水清嘅似乎都感觉到女方太专注事业，埋下分手伏线。后来Stephy在节目中直言，令佢想结婚的动力只系生小朋友，婚姻本身无特别意义：“结左婚又点？结完又唔会令我地感情变好…”讲到呢度，方力申个样其实有点强颜欢笑，但毕竟喺镜头面前，就只能跟王祖蓝举杯说句：“系…我好同意…干左佢！”意图结束话题。

【小方流泪开腔：结婚十周年纪念日分手】
【方力申公开亲吻 邓丽欣感动落泪：为拍《纪念日》减少见面】

再者，Stephy单亲家庭长大，佢未必系《不要离我太远》入面那个弱质纤纤嘅女子，反而佢亲自填词的那首《黑白照》，讲佢细细个已经无爸爸照顾，更加能够突显佢的强悍、独立，习惯咩都自己处理。努力、忙碌令佢有安全感。

Stephy𠮶次喊，在我看来，似感慨流泪多于感动流泪……又，无啦啦，小方十年来从来唔做嘅嘢，突然间做，仲唔系救亡？！感慨流泪，并唔系指失望或者嬲，而系…多谢你喺最后阶段仍然努力尝试，去抢救一段快将结束的关系。

OL纷纷表示金童玉女都分手，以后唔信爱情。“爱情”，从来都只是一刹那，想要天长地久，需要经营的不是爱，是“关系”。

没有谁伤害谁，纯粹价值观不同、意见分歧而断送十年感情，这比谁偷食、谁生厌更叫人伤心。这种分手，背后有个大家都不愿承认的真相──原来你不是对的人。但换个角度，如果这步跨得过，会是永远分不开的一对。

可惜的是，Stephy在节目中也说过：“如果我讲得出（分手），就返唔到转头。”

【由《独家试爱》走到《纪念日》的十大金句】
【由Stephy十年情告终谈起 怎样的恋人比较容易复合？】
【方力申邓丽欣专页】

（本文纯属作者意见，不代表香港01立场。）