劲敌退选　特朗普几乎笃定成总统候选人

接近走过全美国所有繁华大地，经历 47 场初选之后，共和党总统候选人提名战终于有突破性发展喇！先唔使太兴奋，因为发展有突破，剧情冇突破：富商特朗普节节胜利，迫得最大劲敌克鲁兹宣布退选后，最新消息，连俄亥俄州州长卡西奇都投降，退选喇！即系话，特朗普已经近乎铁定会成为共和党嘅总统候选人。

呢几个月嚟，共和党总统候选人提名战真系好睇过《爱．回家》。试问又有边个会谂到，一个“何不食肉糜”嘅富二代，正正系因为太有钱，唔使向商界筹募选举经费（佢话），令人相信佢唔会受到商界大鳄制肘，竟然赢得草根阶层嘅支持！

而且佢得闲无事就信口开河，呢头话要起一道“万里长城”挡住墨西哥移民（要墨西哥畀钱），𠮶头又话要禁止所有伊斯兰信徒入境美国（除咗有钱𠮶啲），劲到连《衰仔乐园》都睇唔过眼要笑佢。你咪理，每一次电视辩论，佢系要拖晒其他竞争对手喺台上一齐泥浆摔角，吸引到好多保守白人嘅支持。

无他嘅，因为特朗普懂得运用恐惧。美国标榜“种族共融”，但种族之间始终冲突不断。根据美国人口普查，50 年内，白人以外嘅族群将会占美国人口过半，呢个时候有个口没遮拦嘅有钱佬提出极保守种族保护主张，食正白人惊惊心理，异军突起。

克鲁兹成日被形容为特朗普最大劲敌，但查实佢一直只系陪跑，直至退选一刻，所得嘅党代表票，都只及特朗普一半。克鲁兹退选后，本来，仲有人幻想俄亥俄州州长卡西奇识玩“敌人的敌人就系朋友”的古老智慧，将“特朗普独大”呢个优点变弱点，尽吸天下反特朗普票源，或足够阻头阻势，令特朗普PASS唔到 1,237 张党代表票嘅合格线，咁就有得玩喇！

睇相佬呃你十年八年，以上幻想系呃你一日；克鲁兹唔玩，卡西奇亦瞬即决定不留。

政治真系一日都嫌长。无论结果如何，我等半个地球以外嘅他者，对于美大选选情，只能隔岸观火食花生，到半年之后，特朗普真正当选了，扫完一地眼镜碎，先再谂谂万一真系会打仗，匿去边都未迟嘅……

 延伸行动： 
因为有特朗普，美国总统大选随时系人类生死存亡嘅关键（误）。想及时分析紧凑嘅选情？一定要密切留意《香港01》博客梁启智嘅【追踪美大选】喇！