看不见的收益：日本全国高中足球大赛
好多本地球迷慨叹港足少新人、难接班，既然系咁何不由学界足球赛事做起？试谂下，如果有机会喺坐满全场嘅大球场比赛，对青少年嚟讲会系一件几振奋嘅事？
文：列奥C@世界波
2016年1月11日，喺日本东京市郊埼玉县曾经举办过世界杯准决赛嘅“埼玉2002体育场”，聚集咗54,090名观众。佢哋嚟唔系睇国家队赛事、唔系睇J-League榜首大战，亦都唔系睇天皇杯决赛，人群有老有少，佢哋入场都只系为咗睇一场中学足球决赛——“第94届日本全国高中足球大赛”（第94回全国高校サッカー选手権大会）。
纵然近年国际赛成绩下滑，西亚足球急促发展，但日本同澳大利亚仍然稳为亚洲足球两大龙头，而日本优胜嘅地方亦都在于出色嘅青训系统，人才辈出。而喺日本足球青训系统之中，除咗球会训练之外，校园足球就系另一个重要嘅摇篮。
但系同日本相比，学界足球赛事喺香港嘅重视程度简直堪称“天与地”。喺连运动都要有奖先有资源嘅香港，“青训”呢啲唔系即食、唔会立刻带嚟回报嘅嘢，当然唔会系“重中之重”啦。
咁点解日本又会将一项本身只系“中学鸡”嘅活动，发展成举国瞩目嘅赛事呢？
看不见的收益：未来
日本高中历年训练出唔少球星，除咗最为人熟悉嘅中田英寿（韮崎高校）之外，本田圭佑（星棱中学校）、中村俊辅（桐光学园）、长友佑都（东福冈高校）、冈崎慎司（滝川第二高校）、大迫勇也（鹿儿岛城西高校）、远藤保仁（鹿儿岛实业高校）、柴崎岳（青森山田高校）、大久保嘉人（国见高等学校）等等，都系喺高中足球比赛有优异表现而为人注目。
以柴崎岳为例，虽然喺2010年第88届日本全国高中足球大赛屈居亚军，次年无缘决赛，但出色表现就令到J-League强队鹿岛鹿角提出邀请，2011年已经马上于联赛中上阵。当然仲有少年时期被横滨水手放弃嘅中村俊辅、连大阪飞脚二队都无缘升上嘅本田圭佑，同样喺高校足球赛事入面被发掘出嚟。
以上届冠军东福冈高校为例，足球部就有280名部员，规模比不少职业球队更加庞大。
喺香港，近两届港超同样有唔少球星都曾经喺学界赛事大显身手：杜瀚滔、叶颂朗、黎耀昌及杨赐麟（董之英）、麦基（英皇佐治五世）、方柏伦（喇沙）、梁冠聪（谭李丽芬）、李嘉耀（圣芳济各）和曾文辉（元朗遵理）等等。
假如学界赛事水准不断提升，相比名存实亡嘅“菁英杯”同预备组赛事，竞争力同吸引力都绝对较高。
看不见的收益：金钱
以上届日本全国高中足球大赛为例，观众都要自费购票入场，另外全国共有43间日本电视台转播，无论现场还是收看转播，观众人数都远远抛离J-League甚至国家队赛事，可以话系唔愁揾唔到赞助商。
喺香港，唔好讲话比赛地点揾一个好啲嘅真草足球场，或者官方帮你做Facebook直播，就连决赛时间都可以系星期一、二下午呢啲普通学生返学时间（虽然今届决赛系2017年3月5号星期日举行），咁又点样可以吸引到人去睇呢？
看不见的收益：学校
日本高中足球每年都有40几间电视台转播，各大名门都想把握机会宣传自己，最好方法系咩？当然系冠军。而各地方政府对学校嘅“进取心”通常都会大加鼓励（呢一点香港就真系跟得好足）。曾经有县政府喺学校获得冠军之后，颁授全队球员荣誉奖。
喺今时今日咩都争一餐嘅香港，对学校嚟讲有咩比用90分钟令全香港都认识你更化算？当然，一切都系建基喺赛事搞得有声有色之上。
（文章纯属作者意见，不代表香港01立场。）