【河国荣被代言】呃鬼佬食曲奇？

呃鬼食豆腐就听得多，呃鬼食曲奇就真系第一次见。

话说“真．香港人”河国荣㖊晚出Post，讲述自己疑似快闪“被代言”经过：收到通知话《苹果日报》想同佢做曲奇访问，去到舖头，畀人安排影完几幅相就完场。结果几日之后“假访问”变咗“真广告”，大赞曲奇有几好，搞到河生要澄清，自己从来无做过呢间被网友怀疑抄袭别人品牌嘅曲奇店代言人。

客观讲，件事其实得三个可能性：

一、河国荣吹水，其实佢真系代言人，不过各种原因反转猪肚。

二、《苹果日报》广告部正＿ ＿，度埋啲咁嘅桥帮客揾星做宣传。

三、个客本身出古惑，呃完鬼之后落广告，陷各人于不义。

关于一，机会趋于零。先唔讲大家几钟意河国荣，几认同佢呢啲“人格信心”，纯以品牌价值讲，明星本身就系个人品牌，无必要冒风险讲大话去抹黑另一间公司，影响自己的品牌效应，除非本身真系牵涉重大问题，例如走代言费，或者好似今次咁，无端端免费代言品牌，咁要爆响口讨公道实在相当合理。

至于人格信心部分，唔使讲，好似法庭判案，都会考虑个证人系咪诚实证人先。河国荣一整段娱乐圈血泪史，好多人都耳熟能详，“默默耕耘”四只字已经系金漆招牌。至于间曲奇舖呢？本身已经畀人话向另一间香港著名曲奇饼“致敬”，后来又反过来出声明话自己畀人伪冒，搬龙门出神入化，有得拣，你拣信边个？

至于二，系假设呢篇系出自《苹果》广告部嘅“软文”（Advertorial），咁照计广告部帮人度呢类膳稿，唔会咁样衰叫个星“快闪”，因为个星本身可以问返客户找数，广告部唔使咁样度桥去呃星兼悭钱，只需谂点同双方取得联系，等个客同个星双方都知对方咩来路，例如系咪用访问形式出，价钱收几多等等。作为中间人，协调归协调度桥还度桥，做唔嚟都无得夹硬嚟，即系畀三千蚊车马费请李安纳度代言得唔得？发梦无咁早啦大哥。

仔细啲睇，篇稿角落头落嘅系“广告”，唔系《苹果》软文常见嘅“客户资讯”，咁个客自己砌成稿畀钱落广告嘅可能性就增加。如果系落广告嘅话，广告部虽然有人帮手砌稿扮内文，但系唔会特登走去问个客“你点揾到个星？”，要审嘅都系美术同法律问题，而唔会过问制作细节。

1.　佢FB曾经出post多谢河国荣

2.　个post畀人系咁留言质问佢系咪呃鬼

3.　admin系咁del相关留言，有杀无赔

4.　累计太多嬲嬲，引刀删post

5.　河生后来回应，系有人冒认《苹果》记者再攞去登报

好啦，咁而家梗系等睇曲奇店声明啦，可能犯法㖞。话说香港稍为出名嘅曲奇饼都好似成日出灾难，一系就难食衰抄袭，一系就唔做香港人生意，其实想关公抖抖，与其攞啲曲奇去拜佢，不如老土啲，谂下点做番间良心企业仲好过。

（更新：灾难嘅野，真系一秒都嫌长。做职安真汉子真系好重要。 曲奇舖未出声明，苹果就先行一步，总编话《苹果》并无“任何编采人员”参与有关广告内容制作。归功于对咗689几年，语言伪术嘅嘢真系要望真，无任何编采人员系真，咁广告人员呢？绝不会混淆新闻采访和广告制作，咁广告制作本身嘅专业操守呢？可能性二而家又死灰复燃啦，苹果广告部会唔会有啲唔系编采人员嘅人员，用自己嘅方式去约河国荣呢？系咪好似李波咁以为自拍比传媒就得呢？曲奇舖快啲出声明啦。）

（本文纯属作者意见，不代表香港01立场。）