琅琊启示录：超低收只因无TVB剧集两个特点

“ 江左梅郎，麒麟之子，得之得天下”系电视剧《琅琊榜》里面嘅一个江湖传言，梅长苏所发挥嘅威力，喺故事里面当然利害。
而喺现实世界，《琅琊榜》亦成为大陆炙手可热嘅剧集，仲红到去韩国。
偏偏嚟到香港，就创咗无线黄金时段嘅最低平均收视纪录，上个星期三收视跌到落16.2点。对比起2014年无线播放嘅《西游记》，被围插佢“胶”之下，都可以守住20点收视关口。
到底《琅琊榜》出咗咩事呢？

2015年9月喺大陆首播，《琅琊榜》点击次数超过 101.8 亿，照数字睇就点都唔似只得 16 点收视。大台回应话，套剧“人物背景错综复杂，观众错失收睇一、两集，就好难追上剧情发展，较难投入”。我就有睇开大台版本嘅，真系会唔睇半集，就错过咗好多嘢而跟唔切。从呢个 point 去睇，大台无讲错。（其余仲有两个理由，第一就系佢哋讲到口臭嘅星期三跑夜马啲收视走咗去J2。另一个理由就有啲创意，话观众钟意睇无线自家制节目。咁就梗系啦大佬，你谂住拎实个免费电视牌照，但净系做转播台呀？）

我想话，大台今次真系买错剧喇！虽然佢已经好醒咁唔买有文化异差嘅时装剧，而系买古装剧，但系对于无线大部分观众，呢套剧真系太深奥。梅长苏嘅计谋，十之八九都唔会立即交代来龙去脉，而系要观众同其他剧中人一样，去等去睇，慢慢去估。观众有时估到、有时估佢唔到，就系套剧最吸引人去睇嘅地方。不过好可惜，呢个绝对唔系大部分睇开无线嘅观众所习惯嘅剧集模式。

咁点先算系佢哋习惯嘅模式呢？就系要有以下两个特点嘞。

第一个特点，就系miss咗一集，都可以估得中晒啲情节嘅。

除咗因为节奏慢，你 miss 咗𠮶集根本无重要嘢发生过之外，仲可能系因为你系资深无线观众，已经捉到佢嘅编剧套路，心意已通。播第一集，你大概都估到个结局系乜，剧情推进自然走唔出你手指罅。

用呢个条件去拣外购剧，拣中嘅机会真系千载难逢。毕竟无线嘅编剧套路，系接近 50 年嚟综合而成嘅形态，要饮无线奶大嘅编剧先可能有呢个意识。何况买剧就系想买啲自己无嘅嘢，如果买啲自己做到嘅嘢，不如自己拍。

所以买剧嘅重点，喺第二个特点度。

要无线嘅观众受落，你要买“广播剧式电视剧”。

即系点呢？你可以揾大台2030播紧嘅《纯熟意外》做个实验。试下唔好望个画面、斋听，你都可以明白晒个剧讲咩，放去电台度播，我觉得都无问题。呢啲就系上次陈维冠监制回应《僵》收视低时所讲嘅“喺厨房听剧情就可以知讲乜”嘅剧集喇。

例如女主角个样已经嬲到出烟，男主角都会走去问佢：

“你唔开心呀，系咪我激亲你呀？”

男主角行埋个雪柜揾嘢食之前就会同空气讲：

“做咗一日嘢，忙到晏都无食，好肚饿呀。”

只用对白、唔用画面去交代推进剧情，自然斋听都可以明白晒故事情节啦。

我唔系话用呢个模式写嘅剧就一定系差呀。呢个只系模式，套剧好唔好睇，要讲内容质素。台剧、韩剧都成日用呢个模式，拍主角个大头做表情，再配返主角自己嘅旁白去交代。《我可能不会爱你》、《来自星星的你》都系咁做，都可以好好睇。大台如果要保住个收视，就要买呢类剧。《武媚娘》就系咁啰，都一样系对白主导，但系制作精细、故事流畅就会好睇。而文章开始时提到嘅《西游记》虽然系胶系肉酸，但胜在佢系一个大家都识嘅故事，大台传统观众睇得明，就会继续开住部电视机睇落去，呢啲就系所谓嘅“惯性收视”，而今次就证明咗呢啲惯性收视绝非铁票嚟，系会流失嘅。

之但系，免费电视台身为一个流行文化嘅桥头堡，推动观众进步系佢哋嘅道德责任，识得透过睇画面、睇布局去了解故事，我觉得系 upgrade 嚟。经过今次“琅琊榜破低价”一役之后，呢个推动进步嘅责任，应该会落喺新台ViuTV身上。

其实新台已经做紧嘢，好似依家后劲凌厉，喺年轻观众当中讨论度愈来愈高嘅《玛嘉烈与大卫 绿豆》咁，用画面交代剧情嘅方法虽然唔系占大部分，但好多时已经撇开咗“我阿妈系女人”式嘅对白。佢受年轻观众欢迎，唔只系因为会将时事融入对白“贴地”咁简单，仲因为佢用一个新嘅模式去做电视剧，呢个先系饿咗好耐电视嘅人觉得欣慰嘅地方。

（本文纯属作者意见，不代表香港01立场。）