港猪与蛇斋饼粽的克星：加权投票

Weighted vote（加权投票）一向有人讲，尽管真系冇乜地方成功实行过。今次好多年轻人都觉得，喂，废老做乜决定咗我哋将来？的确有人讲，不如老人家冇得投票，或者，至少佢𠮶票计八折，或者跟剩返几多预期寿命去投？……以上所讲，全部系禁忌，政治不正确。但反正呢几年兴番回归政治不正确，我唔系完全支持，只系提早去话你知房入面有只大笨象。民主塔利班（我作的词）当然高呼“可怒也”，因为以上讲法挑战咗“人人平等”嘅基本原则。但谂深一层，其实呢啲原则，唔系你想像中咁神圣。即使讲投票都从来唔系“人人平等”。

我有个习惯，坐飞机或去旅行，会睇平时唔得闲睇嘅旧杂志。传媒赶死线，网媒更加样样斗快，但我有时就宁愿慢少少，“让子弹飞一会儿”，唔好跟车太贴。隔一排睇返件事，更有得着。

脱欧派若生在香港　系叫做“港猪”

英国脱欧已成定局，讲再投呀、冇法律效力呀之类，同我见德国落后两球希望对手打球证被踢出局差不多。但，脱欧系一个漫长过程，影响慢而深，实在系应该慢慢讨论，唔系赶在𠮶几日斗快写文。

我都冇得投，亦唔想肉麻到讲自己系乜鬼国际公民（人唔笑狗都吠呀）。但唔使你估作者立场，有得投，我当然投留欧。我接触嘅人，亦绝大多数都系留欧派。包括在英国的旧同事、留学生朋友、远房亲戚、关注嘅网友等等。当然有 bias。呢班人你睇背景都知系留欧。教育程度较高、较为富有。更不用讲有不少系在英欧人，或在欧英人。佢哋唔系北英格兰的愤怒矿工。而工作关系，我睇嘅多数系《金融时报》或《经济学人》，断估我都唔会日日睇《Daily Mail》。所以我见嘅当然唔系全部，但只能就我见到嘅讲。

我见到嘅，当然系佢哋妈声四起。十分合理，既得利益者嘛。但同以往情况（例如大选）唔同，今次我见到，佢哋除咗唔满意结果外，仲十分明显地，矛头指向脱欧政客、制度缺陷，同埋……班选民。

佢哋都讲得好明。简单嚟讲，就系脱欧政客无耻，妖言惑众；而选民脑残，易被煽动，个个系阿毛，都唔知投咗有乜后果。仲有班老而不自私，佢哋就两脚一伸我死后哪管洪水滔天，可怜啲年青人有排受。

传媒早报道过，脱欧同留欧，系两类人。留欧系后生仔、大学生、金融才俊之类。伦敦不用讲，而大学城剑桥、牛津、布里斯托全都留欧。朋友讲话伯明翰唔系，只系因为伯明翰并非真系咁“大学城”。脱欧派普遍年纪大、教育程度低、收入低、住在工业或唔知有乜业的城市。在香港，我哋叫呢啲做“港猪”、“废老”、“维园阿伯”、蛇斋饼粽。你懂的。我大胆讲，呢类意见系英国不少“知识分子”或“才俊”的谂法。

要几民粹有几民粹　民主你个头

不过在香港社会就唔同了，香港不少评论，包括声称英镑冇跌穿十算嘅陶杰，都话：喂，人哋英国人好优秀，决定自己民族嘅前途，成个过程公开公正，少数服从多数，民主示范呀，梗系你啲华文媒体有大一统大中华情意结，先咁反感输打赢要。

Really？你肯定呢个就系“民主”？我怀疑你识唔识乜嘢系民主。定根本好多人，以为民主就只系投票，少数服从多数？英国人真系“选择”咗自己的前途？有咩？

我就倾向同意啲外国朋友，觉得成件事系一大闹剧，畀你睇到恋英青年捧上天的英国，啲公民质素都不过如此，贻笑大方。传媒政客更加要几丑陋有几丑陋，要几无耻有几无耻。

何解咁讲？即系，选民后悔好正常，我点完 A 餐往往都后悔想点 B 餐。几百万人联署都不能当真，52 - 48，冇人唔服先奇。不过呢，啲电视上嘅选民，真系丑态尽现。你可以睇下 BBC 来自曼彻斯特嘅 Adam，或者 ITV 的 Mandy Suthi，笑死冇命赔：

“点知会咁大镬㖞”
“谂住发泄下咋，点知真系会脱欧”
“好后悔呀，谂住可以拎多啲谈判筹码之嘛，点知我𠮶票真系咁重要”

当然，讲英国公民点优秀嘅，会话你知，个别例子啫，传媒抹黑。不过 Lord Ashcroft 的调查一样话你知，脱欧系乜人？就系反对多元文化、反自由主义、唔讲环保、唔讲女权、怕互联网嘅𠮶堆人。你懂的。

好，到啲政客，更加唔使拗。拆大台、种族牌、假承诺、靠吓，乜都出齐，要几民粹有几民粹。仲话畀大家知，可以有着数冇付出。而说好了的“悭番 3.5 亿镑畀 NHS”（国民保健署），投完第日就变八万五咗，快过意甲拉素换领队；正如赵匡胤黄袍加身后，最初说好了南侵的辽国士兵，当然齐齐打边炉。

传媒呢？《Daily Mail》呀、《Telegraph》呀之类，长期都误报欧盟嘅新闻。《经济学人》等当然拎出嚟狂闹。但普罗大众觉得呢啲友离晒地。你钟意企边面，随你。但问良心，你信边份报纸？而脱欧报长期作新闻，就系唔使拗的事实。《太阳报》脱欧派一号打手 Kelvin MacKenzie 喺投完几日已经话好后悔。想唔想像到讲香港自决嘅，在公投后话你知好想返番祖国？

一人一票担保民主？　民主唔止得少数服从多数

个别香港评论员，讲咩民族荣誉呀、自主呀，其实一样咁错。由于冇人打算唔同欧盟贸易，所以英国九成九会跟而家嘅“挪威模式”。咁会点？我话你知，挪威交嘅欧盟会费，多过好多成员国。同时间，挪威收嘅难民数字（计比例啦），仲多过而家英国。咁但系当然呢啲嘢冇人会听。自主荣誉下话？等加税啦。

至于讲咩民主精神，基于以上嘅种种，你肯定啲选民投票时知道自己做紧乜？ 投票前有足够而正常嘅讨论？定觉得总之有投票就系民主？不如话你知，52 – 48，七成投票率，即系合资格选民中仅有 36% 嘅人支持，就已成功脱欧，当中仲要唔知有几多知自己做紧乜。

你参考下其他地方咁大件事，系咪咁低门槛可以过到？Kenneth Rogoff 话斋，呢个唔系民主，系俄罗斯轮盘。更唔好忘记，呢个公投 winners（if any）take all，唔会有比例代表“部分入欧”。咁，仲系 36% 就好民主？某程度上，个门槛，仲低过要调低法定饮酒年纪。

英镑就大跌，但英国股市甚至反弹到高过未公投前，环球其他地方金融市场都 ok。咁啲伦敦朋友就当然冇咁多嘢讲。至少讲伦敦独立都应该只系讲下。但目光放远啲。英国脱欧只系第一响，之后呢啲咁嘅反智民粹投票，陆续有嚟，重头戏当然系美国。

于是，有人已经开始挑战好多人心中嘅禁忌。就系挑战一人一票，你一票同我一票平等。听落好似天经地义，但其实唔系。

大胆预言：跟寿命计的加权投票有机会成真

Weighted vote（加权投票）一向有人讲，尽管真系冇乜地方成功实行过。今次好多年轻人都觉得，喂，废老做乜决定咗我哋将来？佢哋衰咗两脚一伸唔使烦，我哋有几十年受㖞。的确有人讲，不如老人家冇得投票，或者，至少佢𠮶票计八折，或者跟剩返几多预期寿命去投？又或者，有仔女嘅，计多 20% 丫（然后回教徒最多票，嘻嘻），呢啲人先会顾及下一代嘛。大把玩法。

同样地，朋友提议过，个投票权应该系考返嚟，唔系预设就有。听落都合理，开车都要考牌，咁因乜可以畀连欧盟都唔知系乜要上网 Google 嘅人，或者一路收援助一路问“欧盟做过乜”嘅人，去投票决定你未来？香港一样，你见投票站一车由老人院运去嘅“掌心雷”，好多人觉得唔应该有得投——你连投边个都未知㖞大佬。

以上所讲，全部系禁忌，政治不正确。但反正呢几年兴番回归政治不正确，我唔系完全支持，只系提早去话你知房入面有只大笨象。民主塔利班（我作的词）当然高呼“可怒也”，因为以上讲法挑战咗“人人平等”嘅基本原则。但谂深一层，其实呢啲原则，唔系你想像中咁神圣。即使讲投票都从来唔系“人人平等”。

差不多所有社会，都有最低投票年龄，对不？咁已经假设咗未够秤𠮶啲，其实唔系人嚟的。英国已经大把人（当然系后生仔）话应该降到 14 岁。而更搞笑嘅系，投票年纪有下限，但，冇上限！只要你看似（边个知？）唔系十分神智不清，80 岁都可以投。其实，凭乜觉得 80 岁嘅有得投全票，14 岁嘅就零票？人嘅智能，照计去到某个年纪，会变到衰过 14 岁。

本文绝非提倡 weighted vote，但呢样一路只系蛋头学究讨论嘅嘢，会愈嚟愈多人讲，甚至有机会见到成真。到时你就知我系先知。在此以前，当然有人会谂咩伦敦立国，甚至有识之士金融才俊都想立国，唔好同啲反智阿叔一齐癫。之但系，当然讲就易啦。才俊立国，边个扫垃圾？Ok，请外劳。咁边个从军？我在股坛拎开镬铲炒股票，你叫我去拎枪？定雇佣兵咁化学？你点知佢唔会掉转枪头抢你钱？而家，其实啲脱欧选民，咪做紧差不多嘅嘢啰。

（本文纯属作者意见，不代表香港01立场。）